కం.

భార్యల యెదుటన భర్తలు

ధైర్యముగా నోరుఁదెరవ దైవము తాఁ చా

తుర్యపు వరముగ నిలఁ సౌ

కర్యముగా గురక నొసగె గదరా శ్యామా!

(భార్యలముందు నోరు తెరవలేని భర్తలను దయదలచి పరంధాముడు గురకను వరముగా ప్రసాదించెను)

కాలిఫోర్నియా బే ఏరియాలోని "వీక్షణం" సంస్థ ఆధ్వర్యంలో డిసెంబరు 12, 2020న జరిగిన 100 వ సాహితీ (అంతర్జాల) సమావేశంలో అవధాని శ్రీ పాలడుగు శ్రీచరణ్ గారి అష్టావధానంలో ఒక పృచ్ఛకునిగా పాల్గొనే అదృష్టం కలిగింది.

నేనిచ్చిన సమస్య: 

"గెల్వగ నేడ్చె నొక్కడును గెల్వక నోడినవాడు నవ్వగన్"

అవధాని గారి పూరణ:

కల్వల మిత్రునిన్ దలను కమ్రముగా ధరియించు వానికిన్

చెల్వము వామమందునను నిల్వగ కాముడు భీతిజెందె హా

గెల్వగ నేడ్చె నొక్కడును గెల్వక నోడినవాడు నవ్వగన్

పల్వలమందు చందురుడు బాడబరాట్టుగ పొంగినట్లుగన్

నా పూరణ:

నిల్వడి యెన్నికందు తను నెగ్గుటయే యొకధ్యేయమవ్వగన్

పల్వురఁ జేర్చి ఆర్భటిన బాగుగ ద్రవ్యము ధారబోయుచున్

కొల్వును బొందనేమి మరి కూర్చిన సంపద పోయెనంచు తాఁ

గెల్వగ నేడ్చె నొక్కడును గెల్వక నోడినవాడు నవ్వగన్!

ఈ అవధానమును https://youtu.be/IbyyBv9WLw4 లంకెలో 5:30:15 దగ్గరనుండి చూడవచ్చు.

"ఆకులు రాలిన చోటే కొత్త చిగురు కనిపిస్తుంది". ఇవన్నీ కంటితుడుపు కబుర్లని బట్టతల నిరూపిస్తుంది.
 

కం//
ఆకులు రాలిన చోటునె
షోకుగ చిగురొచ్చు ననెడి సూక్తులు వినకోయ్
ప్రాకటముగ బట్టతలన
చేకూరునె వత్తు జుట్టు శ్రీకర శ్యామా!

కం।।
డబ్బది వచ్చును బోవును
ఇబ్బందులు వచ్చిబోవు నిలలో మరి దా
నబ్బది పొట్టది మాత్రము
ఉబ్బుచుఁ దానొచ్చుఁ గాని ఊడదు శ్యామా!

(WhatsAppలో చూసాను: కష్టాలు వస్తాయి పోతాయి, ఆస్తులు వస్తాయి పోతాయి, కానీ పొట్ట మాత్రం వస్తే పోదు :-) )

గోంగూరావతరణము

గోంగూరావతరణము

(3/30/2014)

(ఈ క్రింది పద్యాలలోని కొన్ని భావనలకు ప్రేరణ ఇంతకు పూర్వము కవి మిత్రులతో, ముఖ్యంగా లంక గిరిధర్ మరియు సనత్ శ్రీపతి లతో, జరిగిన ఒక సాహితీ చర్చ. అందులకు వారికి నేను పత్రికాముఖముగా నా కృతజ్ఞతలు తెలియ జేసుకుంటున్నాను)

 

కం//

ఉత్తమమౌ పచ్చడిగా

కుత్తుకకున్ సుఖముఁగూర్చు గోంగూర, భళా!

చిత్తమలరంగ యిదిఁ దిని

మత్తుగనిదరోవు సుఖము మహిలో గలదే!

సీ//

శాక పాకములందు శాకాంబరీ దేవి

                                దీవెనల్ పొందిన తెలుగు కూర

పంచశరుని యొక్క పంచాస్త్రములఁ బోలు

                                పంచాగ్రములుగల పచ్చ కూర

'దేవాంతకుడు' యందు, ధీటుగా N.T.R

                                గొప్పగా పొగిడిన గోగు కూర

ఆకుకూరలెపుడు  ఆరోగ్యమున్ బెంచు

                                యనుచు వైద్యుడొసగు  ఆకుకూర

ఆ.వె//

పప్పు కూరయందు పచ్చళ్ళయందున

పులుపు నొసగు నిదియె పుంటి కూర

ఆంధ్రులనగ మనము అదృష్టవంతులం

బనుచు చాటి చెప్పు ఆకు కూర.

ఆ.వె//

గోగు కూరదెచ్చి బాగుగా మగ్గించి

గరిట పోపు వేసి కమ్మగాను

రోట రుబ్బి దాని నీటుల్లిపాయతో

తినిన అమృతమునది తినిన యట్లె!

కం//

గరుడుడు కష్టములొందుట,

హరిపడతిగ వేషమేసి ఆడుట, కాకో

దరములు దర్భలు నాకుట,

తిరముగ గోంగూర రుచిని తెలియక సుమ్మీ!!

వ.

మత్స్యావతారనంతరము మునులందరు క్రొత్త ప్రదేశములో సరియైన తిండి కుదరక, ముఖ్యంగా నంజుడు లేక, విష్ణువునిలా ప్రార్ధించారు:

కం//

చప్పటి దుంపలు తినుచును

తిప్పలు పడుచుంటిమయ్య దేవా దయతో

గొప్పగు మార్గం బొక్కటి

చెప్పుము మా నాల్క లొక్క చింతలు తీర్పన్

అప్పుడు విష్ణువు, "సృష్ట్యారంభములో ఆవకాయ ఇచ్చానుగదా" అనెను. అప్పుడు మునులు స్వామికి మ్రొక్కి:

ఆ.వె//

"ఆవకాయఁ బెట్ట నైదు రోజులుఁ బట్టు

వేసవందుఁ దప్ప వీలుఁ గాదు

ఎల్లవేళలందు నింపుగా దొరికెడి

పచ్చడొసగు మయ్య పరమ పురుష!"

అన్నారు. అప్పుడు విష్ణువు గోంగూర విత్తనాలు సృష్టించి, మునులకిచ్చి,  ఇట్లనెను:

కం//

ఎక్కడ పడితే అక్కడ

మిక్కుటముగ దొరకు మీకు, మేలును గూర్చున్

చక్కనిదౌ శాకము మీ

ఇక్కట్టులు తీర్చునట్టిదీ గోంగూరే!

  

కం//

గోంగూర వంటి బచ్చడి

గంగానది వంటి జలముఁ గలిగిన యేఱున్

చెంగావి వంటి రంగుయు

మంగాపతి వంటిదైవమవనిన గలవే!!

కం//

శతకముఁ జదవని వాడును

కుతుకముతో గోగు కూర కుడవని వాడున్

గతితప్పక సినిమాలను

అతిగా తాఁ జూడకున్న ఆంధ్రుడు కాడోయ్!

స్టాటిస్టిక్కులు - బికినీలు

మూలము:

Statistics are like Bikinis!! What they conceal is more vital than what they reveal!!    – Aaron Levenstein

నా తర్జుమా ప్రయత్నం:

కం//
స్టాటిస్టిక్సుని నమ్మకు,
పోటీ బికినీలకవియె పోలిక చూడన్!

చాటిన వివరము కన్నను

మాటునదాచినదసలగు మర్మము, శ్యామా!

అష్టావధానము - డా.మేడసాని మోహన్ - రెండవ భాగము

వర్ణన: 18వ తానా ద్వైవార్షిక సభలను వర్ణించమని కోరారు.




           నవ విన్యాస విలాస వైభవము సంధానమ్ము గావించుచున్

           వివిధోద్వీర కళాప్రసంగములలో విద్వత్స్పురద్గోష్ఠిలో

           దివినే మైమరపింపజేసెడి మహోత్తేజంబు తానా సభా

           నివతస్ఫూర్తుల గోచరించెడిది వర్ణింపన్ అసఖ్యంబగున్



ఆశువు-1: తానా సభలకు వచ్చిన కోనేటిరాయుడిని స్తుతిస్తూ..



           తిరుమల వేంకటేశ్వరుడి దివ్య మహాద్భుత వైభవంబులన్

           సరసత అన్నమయ్య విరసత్ స్థవదీయ శుభ ప్రసంగముల్

           పరగగ జేసినాడవు భవ్య గుణోన్నతి ఇందువచ్చినన్

           కరములనెత్తి తా నమెరికా ధర సుస్థలి గూడ కొల్చు సు

           స్థిరతను గాంచి వేంకటపతిన్ నుతియింతును భక్తి యుక్తి తోన్



ఆశువు-2: తానా వారి తెలుగు భోజనం వర్ణిస్తూ..



           విలసితప్రసన్న రుచుల వేడ్కగొల్పునట్టివై

           అలకులికిన మంచిరుచులు అద్భుతావహంబులై

           తెలుగువారి వంటకాల దివ్యరుచులతోడ ఈ

           ఇల వహించి తాన వార మెచ్చుచుంటి తీయగన్





ఆశువు-3: బంగారు భవిష్యత్తుకై పిల్లలను అమెరికా పంపించి, వారిని విడిచి ఉండలేక అమెరికా వచ్చి, ఇక్కడ ఇమడలేక సతమతమయ్యే పెద్దలను వర్ణించ వలెను.



                 భారతీయ జీవన విధా ప్రభితమైన

                 ఆర్ద్ర భావన మనములో అమరి యుండ

                 ఇక్కడి నివాస యోగ్యమౌ ఇక్కటులకు

                 పెద్దలుండంగజాలరు ఇద్ద చరిత



కాయ పఠణము-1: జంధ్యాల పాపయ్య శాస్త్రి గారి కుంతీ కుమారి నుండి

కావ్య పఠణము -2: నంది తిమ్మన విరచిత పారిజాతాపహరణము నుండి

కావ్య పఠణము-3: రామరాజ భూషణుని వసుచరిత్ర నుండి



అప్రస్తుతము:

1. అర్ధనారీశ్వరుడు హైదరాబాదు బస్సు ఎక్కితే ఆడవారి సీటులో కూర్చోవాలా లేక మగవారి సీటులోనా?

2. అరుంధతి పెళ్ళిలో ఆమెకు ఏ నక్షత్రం చూపించారంటారు?

3. పెళ్ళిలో ఉప్మా ఎందుకు అంత రుచిగా ఉంటుంది?

4. అందరూ శృంగార పరమైన సమస్యలడుగుతున్నారు. మ్యాచ్ ఫిక్సింగేమైనా జరిగిందా?

5. కోడి లెక్కలంటే ఏమిటి?

6. సిగరెట్టు త్రాగాడని, నీళ్ళు నమిలాడని అంటారేమిటి?

7. ఐశ్వర్యారాయ్ కి పుట్టేది మగ పిల్లడా ఆడపిల్లా?





ముగింపు:

అవధానిగారు తుఫాన్ ఎక్స్‌ప్రెస్సు వేగంలో పద్యాలు చెప్పడం మూలంగానూ, నా రికార్డింగుని మళ్ళి మళ్ళీ విని నే వ్రాసిన తప్పులు సవరించే సమయం నాకు లేకపోవడం మూలంగా, పైన పద్యాలలో కొన్ని తప్పులు దొర్లి ఉండవచ్చు. ఆ తప్పులు నావిగా భావించి మన్నించ గలరు.



జొన్నవిత్తుల రామలింగేశ్వర రావు గారు, గొల్లపూడి మారుతీ రావు వంటి ప్రభుతులు సభలో ఉండడం మూలంగా అవధాని ఇంతకుపూర్వం వారిచ్చిన సమస్యలకు తన పూరణలు చెప్పి సభనలరించారు. అక్కిరాజు గారు శ్రావ్యమైన గళంతో కావ్యపఠణానికి వన్నె తెచ్చారు. సమయాభాం వలననుకుంటా చివరి ఆవృత్తంలో ఆశువు మరియు కావ్యపఠనము అంశాలను వదిలివేసారు. అప్రస్తుత ప్రసంగంలోని కొన్ని ప్రశ్నలకు అవధానిగారు చమత్కారంగా సమాధానాలిచ్చినా కొన్నిటిని దాటేసారనిపించింది. అయినాకానీ, ఇచ్చిన సమస్యలే కాకుండా చాలా ఉదారణలతో, చమత్కారాలతో అవధానాన్ని చక్కగా నిర్వహించి రక్తి కట్టించారు మేడసాని మోహన్ గారు.