This was written on May 7th, 2026 and was shared on WhatsApp and became quite popular. Unfortunately some people removed my name before forwarding it.  

 

దోసావతారములు

-- పుల్లెల శ్యామసుందర్

1 కం//

దోసెల ముక్కలు గిన్నెన

పోసిన సాంబారు నందు బుడబుడ తేలన్

చూసిన మీనము తీరగు

వాసిగ 'మత్స్యావతార' పగిదిర శ్యామా!

2 కం//

గర్మాగరమ్ము దోసెను

కూర్మాలో నంచుకొనుచు కూరిమి తినగన్

'కూర్మావతార' దోసని

ధర్మముగద దీనిఁ బిలువ ధరణిని శ్యామా!

3 కం//

కుడుమంత వెన్నముద్దను

మడచిన దోసందు నిల్పి మమకారముతో

పడకుండ నోట బెట్టిన

పుడమిని నిల్పిన 'వరాహ' మొప్పును శ్యామా!

4 కం//

గుంటూరు మిర్చి అల్లము

జంటగ కారంపు పొడిని చక్కగ జల్లన్

మంటలు రేగును నోటన

తింటే 'నరసింహ' దోస తిప్పలు శ్యామా!

5 కం//

కొద్దిగ మిగిలిన పిండిని

నొద్దిక నొక చిన్న దోసె నోరిమి చేయన్

అద్దిర 'వామన' దోసన

ముద్దుగ పిల్లలకు ప్రీతి పుల్లెల శ్యామా!

6 కం//

చక్కగ చేతితొ దోసెను

ముక్కలుగా జేసి తినక స్పూనులు కత్తుల్

తక్కడు ఫోర్కులు వాడుట

తిక్కేగద 'పరశురామ' తీరున శ్యామా!

7 కం//

అల్లపు పచ్చడి మాత్రమె

చెల్లును దోసెకని ఏకచెట్నీ వ్రతమున్

ఎల్లప్పుడు పాటించిన

పిల్లా! యది 'రామ' దోసె పేర్కొన శ్యామా!

8 కం//

పుట్నాలల్లము వంటివి

చెట్నీలొక యెనిమిదేసి చిలిపిగ దానిన్

'కిట్నుడి' దోసని పిలుతురు

పట్నమునొక హోటలందు భళిరా శ్యామ!

(కిట్నుడు is slang for కృష్ణుడు)

9 కం//

ఉప్పూ కారము వలదని

చప్పగ దోసెలను జేయ చచ్చును జిహ్వల్

చెప్పగ 'బుద్ధుని' దోసది

నప్పదుగద యట్లు తినిట నరులకు శ్యామా!

10 కం//

గుర్రపు దినుసులు జొన్నలు

కొర్రలతో దోసె చేసి కూరిమి తినగన్

హర్రీ కలియుగమున బల

మర్రా ఈ 'కల్కి' దోసె అవనిని శ్యామా!

(గుర్రపు దినుసులు = Horse Gram = ఉలవలు)