మండే యెండనఁ దిరిగిన మనిషికి మేలౌ!

 సమస్య: మండే యెండనఁ దిరిగిన మనిషికి మేలౌ!

నా పూరణ:

కం//

ఎండది మేనుకుఁ సోకిన

మెండుగ డి-విటమినిచ్చి మేలును గూర్చున్

'సండే' వరకూ వానలు

'మండే' యెండనఁ దిరిగిన మనిషికి మేలౌ!

(సండే = Sunday, మండే = Monday)

(సూర్యరశ్మి వలన శరీరమునకు చాల అవసరమైన D-విటమిను అందుతుంది. అందువలన రోజులో కొంతసేపు ఎండలో తిరగమంటారు)

 

మూడుకు నారును గలుపగ మూడే వచ్చెన్

 సమస్య:-

"మూడుకు నారును గలుపగ మూడే వచ్చెన్"

కం.

కూడికలు నేర్చు బుడతడు

చూడగ లేదాయె కొమ్ము సున్నకు పైనన్

వాడారు సున్నయనుకొని

మూడుకు నారును గలుపగ మూడే వచ్చెన్!

కం.

కూడిక తప్పుర భడవా!

మూడుకు నారును కలుపగ మూడెట్లన్నన్

వాడారు కొమ్ము తుడిచెను

మూడుకు నారును గలుపగ మూడే వచ్చెన్!

 పందిని కౌగలించుకొని పంకజలోచన సంతసించెరో!

ఉ.

కొందరు హాస్యమాడ కడుకూరిమి తోడుతఁ బిల్తురాతనిన్

పందని, కారణంబడుగ ‘పంట దివాకరు’ నామధేయమే

సుందరి పెండ్లిచేసుకుని శోభనమందున ప్రేమమీర యా

‘పంది’ని కౌగలించుకొని పంకజలోచన సంతసించెరో!

తక్కువ డబ్బున్నవాడె ధనవంతుడిలన్పె

కం.

ఎక్కుగ కష్టములొందును

తక్కువ డబ్బున్నవాడె, ధనవంతుడిలన్

జక్కగ తాఁ రొక్కముతో

యిక్కట్లను పారద్రోలు నింపుగ శ్యామా!

 

 

రోహిణి కార్తెలో చలికి లోకులు బాధలనొందురెప్పుడున్

ఉ.

ఐహిక సౌఖ్యముల్ కొఱకు నాపని ఇంధన వాడకమ్ము చే

ఊహలకందనంతగను యుర్విన కాలము తారుమారగున్

ఆహిమకూటముల్ గరుగు, ఆగవు ఎండలు కార్తికమ్మునన్

రోహిణి కార్తెలో చలికి లోకులు బాధలనొందురెప్పుడున్

(ఇంధనకాలుష్యం మూలంగా ఋతువులు తారుమారవుతాయంటారు. ఆ దృష్టిలో పూరిమపబడింది)

తలనొప్పిని దగ్గుమందు తగ్గించునిలన్ 

కం//

తలనొప్పికి వైద్యుడొక్కడు

ఫలితముకై నిత్యరోగి కిచ్చె బెనడ్రిల్

బలమగు నమ్మకముండిన

తలనొప్పిని దగ్గుమందు తగ్గించునిలన్

 సమస్య - సతిని విడచువాడె సజ్జనుండు

ఆ.వె||

పనుల కొరకుఁ దాను పరదేశములకేగ

ఊసులాడ మనుషులుండవలెను

యనుచు దలచి తనదు అత్తమామలవద్ద

సతిని విడచువాడె సజ్జనుండు

 సమస్య - పోట్లాటల వలనఁ గలుగు భువిన సుఖంబుల్

కం || 

చెట్లను నరకుట మంచిది?

చీట్లాటలవలన మనకు జేబులు నిండున్?

ఇట్లాంటిమాటలసత్యము!!

పోట్లాటల వలనఁ గలుగు భువిన సుఖంబుల్?

 సమస్య - అవినీతి కథలు చదివిన ఆనందమగున్

కం.

రవి యనెడి రచయితొక్కడు

కవనంబున క్రైముఁ జేర్చి కథలను వ్రాయున్

నవరస భరితంబగు యా

అవినీతి కథలు చదివిన ఆనందమగున్

 లింగమడ్డు వచ్చె గుడిని మ్రింగ బోవ

తే.గీ.

లింగమడ్డు వచ్చె గుడిని మ్రింగ బోవ

నీతిమాలిన యధికార్లు నిధులు దోచి

లింగమందురతని పేరు లింగరాజు

లింగరాజుండ గుడికిక బెంగ లేదు!

 బేరమాడబోవ నేరమాయె

ఆ.వె.

కోమలాంగి యొకతె కూరలమ్ముచు నుండ

బేరమాడబోవ నేరమాయె

యెపుడు సరుకుఁ గొనగ నెరుగని వానికీ

యట్టి శ్రద్ధదేల నడిగె భార్య!

సమస్య - ఉద్యోగములే దండుగ

కం.     

"ఉద్యోగములే దండుగ?"

మిథ్యది విను, పొట్టకెట్లు మెతుకులు దొరకున్??

ఉద్యోగము లేకుండిన

సాధ్యమె సుఖజీవనమ్ము, జగతిన శ్యామా?

సమస్య: రక్తి లేని భక్తి ముక్తి నిడదు

ఆ.వె.

భక్తి చిత్రమందు భామల కేబరే

లేమిటనుచు నొకఁడు యీసడించ

దర్శకుండు నవ్వి తాత్పర్యముందెల్పె

"రక్తి లేని భక్తి ముక్తి నిడదు!" 

 (June 2010)

 క్రిందపడిననూ అరిచెను కేరింతలతో

కం|| 

సందడిఁ జేయకఁ జొరబడి
అందనిదౌ ఉట్టి కొట్టి అపుడు యశోదా
నందనుడా వెన్నంతయు
క్రిందపడిననూ అరిచెను కేరింతలతో

 కారమె యనిపించె తీపి కలకండవలే

 కం|| 

దోరగ వేగిన గారెలు
కారమె యనిపించె, తీపి కలకండవలే
బూరెలు తోచెను. మరి పులి
హారయు బహు రుచిగనుండె, ఆహా! ఓహో!

(పెళ్ళి భోజనం వర్ణన) (Aug, 2009)

 మగనిని కొట్టిన మగువయె మంచిది ఇలలో

కం||  

జగడములాడ సరసముగ

సిగలో పూదండ కదలి సొగసుగ ఒడిలో
తెగిపడిన మల్లె పూలతొ
మగనిని కొట్టిన మగువయె మంచిది ఇలలో

(June 2009)

 పలువురి తండ్రుల తనయుడు భక్తితొ మ్రొక్కెన్

కం//    

ఇలలో నింపగునొక స్త్రీ

వలువలు తాఁ మార్చినటుల పతులను మార్చెన్

నలుగురు 'నాన్న'లుఁ గలయా

పలువురి తండ్రుల తనయుడు భక్తితొ మ్రొక్కెన్

రావణుని బంటువయితివి రామచంద్ర!

తే.గీ.// 

షోకు కోసము సిగరెట్టు పీకలూది
ఆపుకోలేక ఇప్పుడీ యాతనేల
లోకులను చంపు సిగరెట్టనే కలియుగ
రావణుని బంటువయితివి రామచంద్ర! 

విద్యలేనివాడు వింత పశువు

ఆ.వె:  వేడిగిన్నె చురక వాడిగా తగలగా, వెర్రికేక పెట్టె గొర్రెలాగ, పప్పు చేయబోవ, పలుచగా తేలగా, ఓండ్ర పెట్టెనతడు నోర్వలేక, పాకమువలెనున్న శాకముందినలేక, రంకె వేసెనయ్య రంగచారి, వంట చేసిపెట్ట యింట యిల్లాలు ' శ్రీ, విద్య ' లేని, వాడు, వింత పశువు!!!,

 దొరల సాని ఎటుల దొరసాని అయ్యనో

సీ// దొరల సాని ఎటుల దొరసాని అయ్యనో, తెలియజేతు నిపుడు తెలుసుకొనుము
ఎంతవారైనను కాంతదాసులుకార, తరుణి వలపుతోడ దరికిచేర!
వగలు ఒలకబోసి, వయ్యారములుపోయి, సిగన పూలు తురిమి, సెంటు పూసి
దొరల సాని అటుల దొరసాని అయ్యెరో, చెంత చేరి అతని చెలిమి చేసి!