మత్తకోకిలలో ఛుకుఛుకు రైలు - పద్యం

చిన్నపిల్లల పాటలలో 'ఛుకుఛుకు రైలు వస్తోంది' అన్నపాట చాలమందికి తెలుసు. మొన్ననే మా అమ్మయికి ఆ పాట నేర్పిస్తుంటే దానిని ఛంధోభద్ధంగా వ్రాస్తే ఎలా ఉంటుందన్న ఆలోచన వచ్చింది. లయబద్ధంగా ఉంటుందని మత్తకోకిలలో వ్రాయడానికి ప్రయత్నించాను (మత్తకోకిల పద్యాన్ని 'మత్తకోకిల-మత్తకోకిల-మత్తకోకిల-కోకిలా' అన్న లయతో చదివితే వినడానికి బావుంటుంది).

మూలం: (ఎవరు వ్రాసారో నాకు తెలియదు)

ఛుకుఛుకు రైలు వస్తోంది
పక్కకు పక్కకు జరగండి
ఆగినాక ఎక్కండి
జోజో పాపాయ్ ఏడవకు
లడ్డూ మిఠాయి తినిపిస్తా
చల్లని పాలు త్రాగిస్తా

నా ప్రయత్నం:

మ.కో//
ఛుక్కుఛుక్కని వచ్చుచున్నది జోరు రైలది చూడరా
పక్కపక్కకు నక్కి, ఆగిన బండి నీవపుడెక్కరా
గుక్క పెట్టకు, జోలపాడెద, గోల నీవిక చేయకే
చక్కనైన మిఠాయి తోడుగ చల్లపాలను ఇచ్చెదన్

Eliot కవితకు పద్యానువాదం

ఇది భైరవభట్ల గారి టపాకు సమాధానంగా వ్రాసినది. నేను Eliot కవితలు ఎప్పుడూ చదవలేదు. అందువలన నేను అక్కడ ఇచ్చిన ఆంగ్లవాక్యాలను తర్జుమా చేయడానికి మాత్రమే ప్రయత్నించాను. భావం మారినచో క్షమించగలరు.

కం//
అనువగు చోటును వెదకుచు
మనుజుడు తా తిరుగు లోకమంత, అతడు శో
ధనచేయుట మాన వలదు
కనుగొన మొదలిడిన చోటె ఘనమని శ్యామా!

ఇంచుమించుగా పది సంవత్సరాల క్రితం ఒక Airline advertisement చూచాను(British Ariways అనుకుంటా). అది (ఇంచుమించుగా) ఇలా ఉన్నట్టు గుర్తు: Man travels to many places to realise that Home is the best place on earth. Depend on us for your travels and to get back home. దీనికి స్ఫూరణ Eliot అని ఇప్పుడు నాకనిపిస్తోంది.

ఉత్పలమాలలో శుభాకాంక్షలు

ఉ//
నూతన వత్సరంబు ఇక నూతన శోభను తెచ్చు మీకు, ఆ
సీతయు రాముడున్ గలసి శీఘ్రమె దీవెనలెన్నొ ఇవ్వ, మీ
పాతవి కష్టముల్ తొలగి, పట్టిన కార్యములెల్ల తీరి, మీ
చేతుల నిండుగా ధనము చేరగ చింతలు తీరు గ్రక్కునన్

అమెరికా పద్యాలు

సిలికానాంధ్రా వారి సర్వధారీ నామ సంవత్సర ఉగాది సంబరాలలో జరిగిన కవి సమ్మేళనంలో నేను చదివిన పద్యాలివి. హాస్యం కోసం కొంత, ప్రాసకోసం కొంత, ముఖ్యంగా భాషాజ్ఞానలోపం వలన, అనుకున్న కంటే ఎక్కువగా ఆంగ్లపదాలు వాడవలసి వచ్చింది.

గురు స్మరణ: కవిత్వం చెప్పేముందు చదువు నేర్పిన గురువులను స్మరించడం మన భారతీయుల ఆనవాయితి.

కం//

దుంపలబడిలో గురువులు

చెంపలు వాయించి అపుడు చెప్పిన చదువే

పంపెను కదరా మనలను

గుంపులుగా చేరి ఇచట గోష్ఠులు చేయన్

(నేపథ్యం: అమెరికా వచ్చిన ఒక బామ్మగారు భారత దేశంలో ఉన్న తన మనమరాలికి ఇక్కడ తను చూచిన విషయాలు వివరిస్తూ వ్రాసిన ఉత్తరమిది.)

అమ్మీ,

ఇక్కడకు క్షేమంగా చేరి ఇంచుమించుగా నెల్లాళ్ళయింది. అమెరికా వచ్చిన తరువాత నీకు ఉత్తరం రాస్తానన్నాను కదా. ఇవిగో ఇక్కడి విశేషాలు.

కం//

వచ్చిన క్రొత్తన యన్నియు

చచ్చెడి తికమకగ నుండు, చాలాకాలం

స్విచ్చి పనితీరు తెలియదు,

వచ్చుఁ బగలు నిద్ర, రాత్రి వచ్చును జెట్‌లాగ్!

కం//

దూరము నిక్కడ మనుజులు

కారున పయనింప బట్టు ఘడియల గొలుతుర్

ఊరుకి నూరుకి దూరము

ఆరున్నర గంటలెటుల నడగకె భామా!!

కం//

నిక్కరును షార్టు యందురు,

గెక్కో యగునిచట బల్లి, గేసగు పెట్రోల్,

ట్రక్కనెదరు లారీనిట,

చెక్కని బిల్లుని పిలుతురు, చెప్పెద వినుమా!

ఆ.వె//

బెండకాయ మరియు బీరకాయలె గాక

దొండకాయ కూడ దొరకునిచట,

చక్కగనవియుండ సాలడు పేరున

ఆకులను దినెదరు మేకలాగ!!

కం//

పచ్చడి లేకున్న జిహ్వ

చచ్చునులే తినగ నిచటి చప్పటి కూరల్,

నచ్చదు వీరికి కారం,

వచ్చునె రుచి మిరప లేక వంటల కెపుడున్?!!

కం//

వీకెండున యిల్లువదలి

పోకుండా యుండలేరు, బుర్రకు బోరింగ్

కాకుండా హైకింగని

ఏ కొండో ఎక్కివత్తురిచ్చటి మనుజుల్!!

కం//

తూకం చూసుకు బాబోయ్

హౌకం నేనింతబరువు యయినా ననుచున్

వాకింగ్ చేసెదరాపై

బైకింగే పగలు రాత్రి, బరువది తగ్గన్!!

బామ్మ ఎప్పుడూ వంకలే యెంచుతుందనుకోకు. ఇక్కడ కొన్ని బాగున్న విషయాలివిగో.

కం//

ఎవ్వరినెవ్వరు జూచిన

రువ్వెదరొక చిన్న నవ్వు, రూలది, యేమీ

యవ్వారమనుచుఁ దలపక

నవ్వగవలె నీవుగూడ, నాకది నచ్చెన్!!

కం//

పుచ్చుల వుండవు కూరన,

వచ్చునులే వేడినీళ్ళు పంపున యెపుడున్.

బొచ్చున్న కుక్కలధికము.

మచ్చుకకుఁ గానరావు మశకము లిచటన్!!

చెప్పాలంటే యింకా చాలా విషయాలున్నాయి. మిగిలిన విశేషాలు తరువాత ఉత్తరంలో రాస్తాను.

దీవెనలతో,

నీ బామ్మ

ద్విపదలో ఓటెయ్యండి

నవంబరు 4న అమెరికాలో ఎన్నికలు. ఈమధ్య జరిగిన సర్వేలో (California Bay Areaలో) ఆఫీసుకు ఆలశ్యమవుతుందని చాలామంది ఓటు వెయ్యరని చదివాను. If you don't vote, you lose your right to voice your concerns.


ద్విపద//

ఓటేయరా నీవు ఓటేయకున్న
మాటాడగలహక్కు మట్టిలో మిగులు

డ్యూటీగ భావించు ఓటెయ్యడమును
లేటౌను నాకంటు బ్లేములొద్దోయి

తూటాలకన్న పోరాటాలకన్న
మేటిరా శక్తిలో ఓటుఎన్నడును

ఓటేయరా నీవు ఓటేయకుండ
దాటేసినావంటె తంటాలు నీకె

'తాటి' పద్యాలు

నిన్న దీపావళి టపాకాయలు కొందామని ఒక చైనీస్ కొట్టుకు వెడితే అక్కడ canned తాటిముంజలు కనపడ్డాయి. తెచ్చి వాటిని తింటూంటే పాత రోజులు గుర్తుకు వచ్చాయి.

ఏప్రిల్లో బడి అయిపోయినతరువాత కాలవగట్టమ్మట సైకిలు తొక్కుకుంటూ ఇంటికి వెళుతుంటే అప్పుడప్పుడూ తాటిముంజలమ్మేవాడు దేవుడిలా ఎదురొచ్చేవాడు.

ఉ//
వేసవి కాలమందలసి వేడిభరించుట చాల కష్టమై
మూసిన కళ్ళతో యతని మోము తలంచుచు మ్రొక్కి వేడగా
దాసుడి రక్షకై యతడు తారసమాయెను భూమిపై వడిన్
వాసివి తాటిముంజలను పైకము కమ్మెడివాని రూపునన్

(సైకిలు త్రొక్కుతున్నప్పుడు కూడా ప్రాసకోసం కళ్ళు మూసుకోవలసి వచ్చింది :-)

పల్లెటూళ్ళలో పెరిగిన పిల్లలందరికీ వేసవిలో తాటికాయలతో తోపుడు బళ్ళు చేసుకుని ఆడుకోవడం ఆనవాయితి.

ఉ//
తిన్నని తాటిమట్టగని తెప్పున కన్నము చేసి అందు నో
సన్నని కర్రపుల్లొదవి చక్కని గుండ్రని తాటికాయలన్
ఎన్నిక చేసి వాటముగ నీదరి నాదరి గ్రుచ్చి నంత నో
మిన్నగు తోపుబండగును మేలుగ పిల్లలు ఆటలాడగా

కం//
లెక్కకు మూడవి ఉన్నను
ముక్కంటికి కన్ను ఒకటి మూసుకునుండున్
నిక్కముగా ముక్కంటది
చక్కనిదొక తాటికాయ సరసుడ వినుమా!

ఉత్పలమాల

(వ్యాఖ్యల ననుసరించి కొద్దిగా సవరించిన పద్యం)
ఉ//
బ్లాగుని వ్రాయగా తలచి బ్లాగుట నేర్వగ పట్టుపట్టి నే
గూగులు బాగుగా వెదకి కొద్దిగ మార్గము కానరాగ వే
వేగమె బ్లాగునుందెరచి వేసితినొక్క టపాను ఇంక నా
వాగుడు పద్యరూపమున వ్రాయగ యత్నము చేసెదన్ సుమీ!

(మొదట వ్రాసినది)

ఉ//
బ్లాగుని వ్రాయగా తలచి బ్లాగుట నేర్వగ కూరుచుండి నే
గూగులు బాగుగా వెతకి కొంచము జ్ఞానము పొందినంత వే
వేగమె బ్లాగునుందెరచి వేసితి నొక్క టపాను, ఇంకనా
వాగుడు పద్యరూపమున వ్రాయుటకున్ ప్రయత్నించెదన్, భళీ!